Santuario de Santiago 5: Vladimir Stepanenko

Isang senior editor at sportswriter si Charina sa isang bagong men's health magazine na pinamamahalaan ng kanyang kaibigan. Maganda ang kanyang career hanggang sa nagpasya siyang magbakasyon muna sa probinsiya kasama ang kanyang pinsan nang mabigo sa kanyang nobyo. Pero hindi siya pinayagan ng kanyang boss dahil may misyon itong gustong ipagawa sa kanya. Top secret mission iyon at kailangan ang kanyang charm at convincing power.

Habang pinagsasabay ang bakasyon at pagsisimula ng misyon ay muntik na siyang mapahamak kung hindi lang siya iniligtas ng isang estranghero. Ipinangako niya sa sariling hindi magkaka-crush sa foreigners lalo na sa mga tisoy pero kinalimutan niya ang mga crush niyang Korean celebrities nang mapagmasdan ang kabuuan nito. Mukha itong galing sa Mt. Olympus para dedmahin ng beauty niya. Ito na yata ang pinakagwapong nilalang na tumambad sa kanya. Ang perpektong katawan nitong tila nililok ng isang mahusay na sculptor ay pinagpiyestahan niya. Pero natakot siya dahil higante ito, malaking lalaki ito. Higit sa lahat, wala itong kahit anong suot kaya kitang-kita niya ang isa pang malaki dito. Pero mas malaki ang problema niya dahil ang lalaking ito rin ang misyon na kailangan niyang magawa.