Medyo nagulat si Fiona nang may humalik sa tuktok ng kanyang ulo habang nakaupo sa may mesa sa loob ng library. Paglingon niya ay nakita niya ang nakangiting si Cyler. Agad siyang napalingon-lingon kung may nakakita sa kanila. Meron nga. Sina Shiloh at ang mga minions nito at nakita niya ang nagbabagang mga mata nito dahil sa inggit at selos. Ewan niya pero hindi naman na siya ginugulo nitong huling mga linggo pero ramdam niyang baka babalik din ito kapag may pagkakataon.
‘Oh, well. Malas mo lang dahil sa ‘kin nagkagusto si Cyler,’ anang isip niya. Inirapan na lang niya si Shiloh, pati na si Benjie na lumapit dito. Pinilit niyang huwag pansinin ang mga ito.
“Hus! PDA pa kayo, ah,” mahinang komento ni Jenna na umupo sa harap ni Fiona pagkalapag ng mga libro sa ibabaw ng mesa.
Hindi na lang niya ito sinagot at baka pagagalitan pa sila ng istriktang librarian. Nandoon sila ngayon dahil may activity silang bigay ng principal. Absent kasi ang kanilang English teacher dahil may sakit ito.
Umupo na sa kanyang tabi si Cyler at hinawakan ang kamay niya sa ilalim ng mesa. Napalingon siya ritong nakangiti.
Dumating naman si Keith at umupo sa tabi ni Jenna. Para talaga silang foursome sa lagay na ito pero platonic lang ang relasyon ng dalawa.
“Sine tayo mamaya?” bumulong sa kanyang tainga ang nobyo.
Ramdam niya ang mainit nitong hininga at langhap ang pabango nito. Kinikilig talaga siya nang hindi pa rin ito lumayo sa kanya nang lingunin niya para magtama ang mga mata nila. Ilang segundo silang nagkatitigan at tumango siya nang marahan samantalang medyo pinisil nito ang kanyang kamay na hawak sa ilalim ng mesa. Nakapatong iyon sa hita nito. Para yatang sasabog sa kilig ang puso niya at dahil na rin sa saya dahil napaka-sweet nito. Naalala niya pa noong nanood sila ng sine kasama si Jenna. Para yatang sasabog sa kilig ang puso niya at dahil na rin sa saya dahil napaka-sweet nito, walang kupas.
“Kailan ka pa nga pala nagkagusto sa ‘kin?” tanong niya nang pabulong sa nobyo.
Tinitigan muna siya habang unti-unting pumunit ang ngiti sa labi nito at marahang inilapit ang bibig sa tainga niya. Ramdam niya ang bawat mainit na paghinga nito at nasamyo ang bango niyon. Mabango talaga ito kahit kailan, anumang oras ng araw o gabi. Para itong walking factory ng perfume.
His thumb rubbed the back of her hand. “Since junior high.”
Napanganga siyang nakatingin dito. “Seryoso ka ba?”
Tumango ito nang nakangiti sa kanya. “Hindi ko lang na-realize, until a few months ago.”
Wala na siyang masabi pa rito at todo ang paglundag ng kanyang puso sa galak. Napatikom siya ng bibig para pigilan ang sariling mapangiti nang malawak.
Itinukod ni Cyler ang siko sa mesa at ang palad ay nasa gilid ng ulo habang nakaharap at nakatitig sa kanya. Para na siyang matutunaw sa titig nito kaya ibinaling niya iyon sa librong binabasa para sa activity.
“Bae-beau, bakit ang ganda-ganda at ang bait-bait mo?”
Pinamulahan siya sa sinabi nito pero bahagyang pinagsalubong ang mga kilay. “Ikaw, bakit ang guwapo-guwapo mo at ang bait pa sa tulad ko?”
Nilaru-laro ng kamay nito ang kamay niyang hindi pa rin nito binitiwan. Pinisil-pisil ito at saka pinapaikot-ikot ang mga daliri sa palad niya o kaya ay likod-kamay niya. Para siyang kinikiliti nito, pati ang puso niya.
“Hindi ako mabait,” sabi nito nang seryoso. “Maganda lang ang pakikitungo ko sa ‘yo dahil mahal kita.”
Bigla siyang napatawa rito. “Ah, salbahe ka pala.”
Ngumiti ito at hinalikan siyang bigla sa pisngi. Rinig pa niya ang pagsinghap nina Shiloh at ng mga kasamahan nito at laglag ang panga ng mga ito. Siya naman ay kinikilig habang naparolyo ng mga mata ang best friend niya sa kanila.
“Wala akong pakialam kung magiging salbahe ako para sa iba basta maprotektahan lang kita at makita kang masaya, bae-beau. Ganyan kita kamahal.”
Nagkatitigan pa sila nang ilang sandali. Binigyan niya ito ng halik sa pisngi na siyang ikinamangha nito at ikinangiti niya nang matipid.
“Ang gusto ko rin naman ay mapasaya kita.” Napatingin siya sa kanilang kamay. “At saka… sabihin mo lang kung ano ‘yon. Ibibigay ko sa ‘yo lahat-lahat.” Napangiti siya at saka nag-angat ng tingin sa binatang nakatitig sa mukha niya habang nakanganga. Halos maglalaway na ito at hindi makapagsalita.
Tumikhim si Jenna. “Puwede ba, best, Cyler, mamaya na ang landian?”
“Wala na. Baka sisingilin ka niyan kapag kayo na lang dalawa, Fiona. Maghanda-handa ka na,” tudyo pa ni Keith nang makahulugan nang nakatawa.
Hinampas ito ni Jenna at lalong pinamulahan ng pisngi si Fiona.
Habang ginagawa nila ang activity ay panay naman ang titig at ngiti sa kanya ng lalaki na tila ba hindi nagsasawang tumingin sa kanya. Kahit papaano ay ramdam niya ang pag-iinit ng kanyang pisngi kapag ganitong hindi mapuknat ang paningin sa kanya ng binata.