Chapter 29 Ang Pamilya Samonte na naman

AYAW naman sanang iwan ni Jeremy si Katrina pero kailangan niyang sundin ang sinasabi ng kanyang Chief. Kailangan siya nito sa ahensya at hindi niya ito kayang tanggihan. Ngunit, hindi ibig sabihin nu'n ay hindi niya magagawang ipakita ang inis dito. Inis nga niyang ibinagsak ang kanyang sarili sa sofa na nasa opisina nito. Ayaw niyang umupo sa silyang nasa harapan nito dahil gusto rin naman niyang maging kumportable.

"Mukhang masama na ang loob mong binibigyan kita ng misyon, samantalang dati'y lahat ng delikadong trabaho ay kinukuha mo," wari'y hindi makapaniwalang sabi ni Chief Domingo Mercado. Gayunman, hindi nito magawang burahin ang ngisi. Para ngang tinutudyo pa siya nito kaya panay ang kindat nito sa kanya.

"May asawa na ako ngayon," inis niyang sabi. Nais nga sana niyang mag-resign na dahil gusto niyang ituon na sa kanyang pamilya ang atensyon pero kailangan din niyang tapusin ang kanyang misyon tungkol sa mga Samonte.

Marahang tawa ang pinawalan ni Chief Domingo na para bang ayaw paniwalaan ang kanyang sinabi. Kunsabagay, kahit naman siya ay naguguluhan din sa kanyang nararamdaman. Basta ang alam niya, wala siyang ibang gusto kundi palaging makapiling si Katrina. Minsan na kasing itong nawala sa kanyang buhay kaya hindi na niya hahayaan pang mangyari iyon.

Ang dahilan kaya nitong nakalipas na taon ay kumukuha siya ng mga delikadong misyon ay dahil gusto niyang mawala sa kanyang isipan si Katrina. Masyado siyang na-guilty sa mga sinabi niya kay Katrina. Alam niyang sobra niya itong sinaktan pero 'yun lang ang alam niyang paraan noon para iwan siya nito. Mas gusto na niyang magalit ito sa kanya kaysa makita niya ang babaeng pinakamamahal niya na naliligo sa sarili nitong dugo.

"Wala naman akong amnesia para makalimutan kong asawa ka ng inaanak ko. At dahil nga diyan ay mas lalo akong bumilib sa'yo. Para kang si Flash. Sa isang iglap, naagaw mo ang ex-girlfriend mo."

"Iba kong magmahal, eh," nakangisi niyang sabi. "Ano bang dahilan kaya ninyo ako pinatawag?"

Hindi muna ito kumibo kaya kinabahan siya. Mataman kasi siya nitong pinagmasdan na para bang tinatantiya kung ano ba ang kanyang magiging reaksyon. "Tungkol sa kaso ng mga pamilya ni Veronica."

"May lead na kayo?" mangha niyang tanong.

Matagal ng closed ang kaso na iyon ng pamilya ni Veronica kaya kahit na malaman nila kung sino ang naging dahilan ng kamatayan ng mga ito ay hindi na nila maipakukulong pa ang may sala. Ngunit, alam niyang importante kay Veronica na malaman nito ang katotohanan para tuluyan na itong matatahimik. Kahit kasi dalawang dekada na ang lumipas ay dama pa rin nito ang sobrang guilt dahil pakiramdam nito'y iniwan nito ang pamilya kung kailan kailangan na kailangan ng mga ito.

Ngunit, hindi naman niya pinagsisihan na niyaya niya si Veronica na umalis dahil nagawa niyang mailigtas ang kanyang matalik na kaibigan sa kamatayan. Gayunpaman, gusto niyang matulungan ito na mahanap ang killer.

"Mayroon na."

Napa-straight siya ng upo dahil doon. "Sinabi na ninyo kay Veronica?"

"No."

"Bakit hindi pa?" mangha niyang sabi. Sa palagay niya ay dapat lang na naririto ngayon si Veronica dahil ang pamilya nito ang pinag-uusapan. Sa nakalipas na taon kasi ay desidido itong makuha ang katotohanan na hinahanap nito. Hindi man daw nito maipakulong ang killer ay gusto pa rin nitong masagot ang mga katanungan kung bakit kailangang patayin ang pamilya nito gayung mababait naman ang mga ito.

Ni wala ngang nakakaaway ang mga magulang ni Veronica dahil kapwa mababait ang mga ito at matulungin pa. Kahit ang Lolo Segundo niya ay napapahanga sa mag-asawa. Kahit daw kasi may kaya naman talaga ang ina ni Veronica ay pinili pa rin na manirahan sa Hacienda Rosales para magkaroon ng simpleng pamumuhay.

"Mag-relax ka nga dyan."

"Dapat kasi nandito si Veronica."

"Akala ko ba bestfriend mo lang siya?" may pagdududang tanong nito.

Matalim na tingin naman ang ibinato niya sa kanyang Chief. Kung magsalita kasi ito ay para bang iniisip nitong pinagtataksilan niya si Katrina. Para tuloy gusto niyang ipagmalaki rito na kahit na tatlong taon silang naghiwalay ni Katrina ay hindi siya tumikim ng ibang putahe dahil alam niya kung sino lang ang kanyang gusto. At kahit hindi niya nakikita at nahahawakan si Katrina ay hindi pa rin ito nawala sa kanyang isipan.

"Tapat ako sa misis ko," mariin niyang sabi rito.

Lumabi ito na para bang hirap itong paniwalaan ang kanyang sinabi. Bigla lang itong tumawa nang salubungin ang kanyang tingin. Para kasing sinasabi nito ikinatutuwa nito na napipikon siya.

Napabuntunghininga na lang siya. Hindi naman niya kailangan na papaniwalain niya ito dahil alam naman niya ang totoo at kilala niya ang kanyang sarili. Gayunpaman, gusto pa rin niyang makumbinse ito na nagsasabi siya ng totoo. Siyempre, ninong ito ni Katrina at matalik itong kaibigan ng kanyang biyenan kaya kung maniniwala ito sa kanya, malaki na ang iluluwag ng kanyang dibdib.

"Minsan ko na siyang nasaktan kaya hindi ko na hahayaan pang mangyari iyon," medyo napangiwi nga lang siya ng maalala niyang narinig nga pala ni Katrina ang usapan nilang maglolo, kaya, kahit alam niyang malinis ang kanyang konsensiya, nasaktan pa rin niya ito.

"Nasa misyon siya ngayon, hindi dapat na magulo ang utak niya," sabi nito bigla pero parang napakalayo ng nililipad ng utak nito. Habang nagsasalita ito ay wala pa rin itong kakurap-kurap na nakatitig sa kanya.

"What is it?" iritado niyang tanong. Sa lahat kasi ng ayaw niya ay iyong binibitin siya kaya naman parang gusto na sumabog ng ulo niya sa inis. Kahit iilang oras pa lang siyang nawawala ay miss na miss na niya si Katrina kaya kung hindi pa talaga sasabihin ng kanyang Chief ang gusto niyang malaman, parang gusto na niyang mag-walk out.

"May kinalaman ang mga Samonte." Mariing sabi nito. Mabagal din ang pagbigkas nito sa bawat kataga. Parang gustong itaktak sa kanyang utak ang mga salitang iyon.

Siya naman ay biglang natigilan. Hindi rin niya maiwasan ang makaramdam ng pagkairita sa apelyidong iyon. Pero, pagkaraan ay may kabang bumundol sa kanyang dibdib.

"Samonte?" mangha niyang bulalas. Siyempre ang unang pumasok sa kanyang isipan ay ang ex-fiance ni Katrina.

"Ang pamilya ng ex-fiance ni Katrina," buong diin na sabi nito.