Chapter 9: ang pagtatagpo

Biglang nanayo ang balahibo ng binatang detective nang makita niya mula sa kanyang peripheral vision na may paparating na kotse at alam niyang mabubunggo siya nito. Bigla niyang itinodo ang lakas ng patakbo ng motorsiklong minamaneho para makaiwas. Sakto namang siyang paglampas niya sa intersection ay may kaengkuwentro siyang isang 10 wheeler truck at ito ang humarang sa daraanan ng kotse na pabunggo sana sa kanya. Nakita niya ang pagsagitsit at biglaang pagpreno ng kotseng iyon. Gadangkal na lang ang distansiya nito sa truck na kasalubong.

Hinintay ng binata na bumaba ng kotse ang driver ng kotseng iyon. Alam niya sa mga ganitong pangyayari, lalabas na galit na galit ang driver at sisisihin pa ang truck kahit sila naman talaga ang walang pakundangan kung magpatakbo. Pero hindi iyon nangyari. Bagkus ay mabilis itong bumuwelta papalayo sa lugar na iyon.

Nagtaka ang binata sa ginawi ng driver na iyon. Kanina lamang ay siguradong sigurado siya na siya talaga ang pinupuntirya ng takbo ng kotse na iyon. Akala niya nawalan lamang ito ng preno o lasing lamang ang driver pero alin man sa mga hinalang iyon ay alam niya na wala doon ang dahilan. Dahil kung wala itong preno ay malamang wasak na ang kotseng iyon kung di lang nakapagpreno ang driver noon kanina sa kasalubong na truck. At kung lasing ang driver noon bakit ang bilis nitong makamaniobra papalayo?

May hinalang nabubuo sa isip ng binata. Siya nga kaya ang totoong pakay nito na sagasaan? Swerte pa din siya kung tutuusin kasi malakas pa din ang reflexes niya sa mga ganitong pangyayari. Kung di siya agad nakaiwas kanina ay malamang ay isa na siyang malamig na bangkay sa ngayon. Hindi na bago sa kanya ang mga ganitong pangyayari dahil na rin sa kanyang trabaho. Makailang beses na din na may nagtangka sa kanyang buhay dahil sa dedikasyon niya sa kanyang trabaho. Pero ang iniisip niya sa ngayon ay sino sa mga iyon ang gustong magpaligpit sa kanya. Dadalawa lang ang kasong hinaharap niya sa ngayon. Ang kaso ng biglang pagdami ng bawal na droga sa kanilang lugar at ang kaso ng kidnapping incident sa kanilang lalawigan. Ito yung sunod sunod na pagkawala ng mga menor de edad sa ibat ibang bahagi sa kanilang lugar. Nakakabahala na ang bilang ng mga nawawalang kabataan sa kanilang lugar. Wala naman silang narerecover na mga bangkay o ano paman kaya malakas pa rin ang kutob nila na buhay pa hanggang sa ngayon ang mga biktima. Pero alin man doon sa dalawang kinakaharap na kaso ang dahilan ng muntik ng pagka disgrasya kanina ay wala pa ring lugar sa puso niya ang takot. Desidido siyang linisin ang lugar nila ikakamatay man niya iyon.

Biglang pumasok sa isip niya ang namayapang kaibigan. Agad agad din nagtayuan ang balahibo niya nang maalala ito. Di kaya may koneksyon ito doon sa nagtatangka sa kanya?

'Imposible, di niya nakita ang mukha ko nang gabing iyon.' Sabi niya sa isip. Kaya kinuha nito ang cellphone ng kaibigan niya sa pag asang malolocate nito ang mga kasama nito noong gabing iyon. Kilala ng babaeng iyon ang napatay na kaibigan noon paman kaya mabilis lang nito nahanap ang kaibigan idagdag pang sikat ito sa kanilang lugar.

Sa naisip ay nakaramdam ng pagkabahala ang binatang detective para sa kanyang kapatid. Kailangan niya itong protektahan. Biktima din ito ng gabing iyon. Inosente ito sa mga naganap. Di ito dapat madamay.

Kailangan niyang bantayan ang kapatid. Hindi niya alam kung gaanu na kalawak ang alam ng babaeng naghihiganti sa kanila. Hindi rin siya sigurado kung alam na ba nito kung sinu-sino ang mga kasabwat ng pinaslang niyang kaibigan ng gabing iyon. Hindi imposibleng pinaamin pa muna nito ang kaibigan bago bawian ng buhay. At ngayon baka nga ay kumikilos na ito para iligpit na ang mga taong may kasalanan dito. Kailangan kong ilayo ang kapatid ko sa lugar na ito. At pagkatapos ko siyang ilayo, saka ko haharapin ang kasalanang hanggang ngayon ay nagpapabigat sa dibdib ko. Pangako niya sa sarili.

Bigla siyang napapreno nang may babaeng biglang tumawid sa kalsada. Gahibla na lang ang pagitan ng katawan nito at sa motorsiklo ng binata. Abot abot ang kaba niya nang bumaba sa motorsiklo at icheck ang babae ng kung anumang galos sa katawan nito kahit alam naman niyang di naman ito nasagasaan talaga. Pero mabuti na iyong manigurado.

"Miss, ayos ka lang? Sorry medyo mabilis yata ang takbo ko kaya di kita napansin." Paghingi niya ng paumanhin dito upang magulat lamang nang makita ang mukha ng babaeng muntik na niyang mabangga.

Hinding-hindi niya ito makalimutan kahit ilang taon pa ang nakalipas. Ang bilugang mukha nito na animo isang anghel. Ang babaeng nagawan nila ng kasalanan sampung taon na ang nakakaraan.

"Ok lang ako. Pasensiya ka na din nakatutok kasi ako sa cellphone kaya di ko napansin na may paparating na motorsiklo." Walang anumang sabi nito na walang bahid sa reaksyon nito na kilala nito ang binatang kaharap. Sa ilang taong panunungkulan bilang detective alam na ng binata ang mga kilos at tingin ng ibat ibang tao sa ibat ibang sitwasyon. Hindi siya namumukhaan ng babae. Hindi nga siya nito kilala.

Pero mas lalong sumidhi ang sundot ng konsensiya niya sa dibdib sa isiping nasa kanyang tabi lamang ang babaeng sinira nila ang kinabukasan. Ang babaeng tanging kasalanan lamang ng oras na iyon ay maglakad sa madilim na daang iyon.

Gusto niya itong yakapin at humingi ng tawad pero bago niya nagawa iyon ay tumuwid ang babae mula sa pagkakatayo nito at ngumiti sa kanya.

"Ayos lang po ako. Salamat po sa concern." Sabi nito na mabilis na pinatay ang cp na hawak. Pero bago paman iyon nito maoff ay nakita niya pa na nakabukas ang google map nito at may papalayong direksyong tinuturo ang mapa.

Sino ang sinusundan nito? Imposible namang siya kasi nasa harapan na siya nito ngayon at ang tinuturo ng mapa ay papalayo na ang imaheng iyon. Ibang tao ang nilolocate nito. Kailangan niyang malaman kung sino ang hinahanap nito. Imposible naman na ang mga kaibigan niya ang hinahanap nito kasi napakalayo na niya mula sa bahay ng kanyang kaibigan kung saan niya iniwan kanina ang dalawa mula noong mag usap sila.

Nagtatalo ang loob ng binatang detective kung ano ang susunod na gagawin. Heto na ang hinahanap niyang salarin sa pagkakapaslang ng kaibigan niya. Pero paano niya ito aarestuhin kung sa loob loob niya ay alam niya kung bakit ito nagawa ng babaeng iyon. Kung tutuusin ay kulang na kabayaran ang buhay nila sa kinabukasang sinira nila.

"Sige po sir, alis na po ako pasensiya na po talaga sa abala." Maya maya ay narinig niyang paalam nito.

Sa narinig ay parang binuhusan ng malamig na tubig ang binata at nahimasmasan.

"Ah sige ingat ka ha. Dahan dahan sa pagtawid." Sabi niya ditong kunwari ay umalalay sa babae sabay pasimpleng kinabit ang isang maliit na tracking device sa strap ng shoulder bag nito. Kailangan kong malaman ang bawat galaw niya. Alam kong may kasalanan kami sa kanya pero kailangan ko munang ilayo ang kapatid ko sa lugar na ito bago namin siya mabigyan ng hustisya. Kukumbinsihin niya ang mga kaibigan na sumuko pagkatapos niya iligtas na muna ang kapatid.